ශ්‍රී ලංකාවට මුදල් දෙන්න මූල්‍ය ආයතන බලා සිටී

6

ශ්‍රී ලංකාවට මුදල් ලබාදීමට එකඟතාව පළ කරන ලද ණයදෙන ආයතන ශ්‍රේෂ්ඨාධිකරණය තීන්දුව ලැබෙන තුරු සහ දේශපාලන තත්ත්වයේ යම් ස්ථාවර බවක් ඇතිවන තුරු අදාළ තීරණ පසුවට කල් දමා ඇතැයි රජයේ විශ්වාසනීය ආරංචි මාර්ග සඳහන් කරයි.

“අපිට කළමනාකරණය කරගත හැකි මට්ටමකට ණය අවශ්‍යතාව පැමිණිය හොත් තත්ත්වය කළමනාකරණය කරගන්න පුළුවන්” රජයේ ජ්‍යෙෂ්ඨ නිලධාරියෙක් කීය.

“කෙසේ නමුත් පසුගිය මාසයේදී ඇති වූ සිදුවීම්, තත්ත්වය තවත් දුෂ්කර කළා” යැයි ඔහු කීය.

“ඉදිරි මාස 15 ක කාලයේදී ගෙවීමට ඇති ණය සම්බන්ධයෙන් අපි සැලසුම් සකස් කළා. අපිට මධ්‍යකාලීන ණය උපායමාර්ගයක් තිබුණා. එහෙත් දැන් එම සැලසුම් තර්ජනයට ලක්වෙලා. එම සැලසුම් සියල්ල කුණු කූඬේට දාලා. මුලින් අපිට මුදල් දෙන්න පොරොන්දු වූ මිනිස්සු (ආයතන, රටවල්) දැන් ඒ තීරණ පසුපසට අරගෙන. නඩු තීන්දුව කුමක් වනු ඇත්දැයි බලන්න අවශ්‍ය බව ඔවුන් කියනවා” යැයි ද එම නිලධාරියා කීවේය.

පාර්ලිමේන්තුව විසුරුවා හරිමින් කඩිනම් මැතිවරණයක් කැඳවීමට ජනාධිපතිවරයා පියවර ගත්තේය. අදාළ තීන්දුව අභියෝගයට ලක් කරමින් ශ්‍රේෂ්ඨාධිකරණයට පෙත්සම් ඉදිරිපත් වූ අතර එම නඩු විභාගයේ තීන්දුව මේ සතියේ දී ලබාදෙනු ඇතැයි වාර්තා වේ.

පාර්ලිමේන්තුවේදී විශ්වාසභංග යෝජනා දෙකක් සම්මත වූ බැවින් මහින්ද රාජපක්ෂ මහතාට අග්‍රාමාත්‍ය ධුරය දැරීමට හැකි ද යන්න පිළිබඳව අභියාචනාධිකරණය ද ඉදිරියේදී තීන්දුවක් ලබාදීමට නියමිතය. කැබිනට් මණ්ඩලයේ නීත්‍යනුකූල බව පිළිබඳව ද ප්‍රශ්නකාරී තත්ත්වයක් උද්ගත වී ඇත.

ලබන වසරේ ජනවාරි සහ අප්‍රේල් මාසවලදී කල් පිරෙන එක්සත් ජනපද ඩොලර් බිලියන 1.5කින් ජාත්‍යන්තර බැඳුම්කර ගෙවීම සඳහා අවශ්‍ය පියවර ගෙන ඇතැයි ආණ්ඩුව පසුගිය දිනක ප්‍රකාශ කළේය.

එයින් එක්සත් ජනපද ඩොලර් බිලියනයක මුදල් ජනවාරි 15 වැනිදා ගෙවිය යුතුව ඇත. මේ අනුව ගෙන ඇති එක් පියරවක් වනුයේ චීන සංවර්ධන බැංකුවෙන් එක්සත් ජනපද ඩොලර් මිලියන 500ක මුදලක් ලබාගැනීම සඳහා සාකච්ඡා ආරම්භ කිරීමය.

එහෙත් අදාළ සාකච්ඡා ද තාවකාලිකව නැවතී තිබේ. ශ්‍රී ලංකාව දැනටමත් චීන සංවර්ධන බැංකුවෙන් එක්සත් ජනපද ඩොලර් බිලියනයක මුදලක් ලබාගෙන ඇත.


“අපි සාකච්ඡා පැවැත්වූවා. එහෙත් ශ්‍රේෂ්ඨාධිකරණ තීන්දුව ලැබෙන තෙක් අපි බලා ඉන්නවා. එතෙක් කවුරුවත් අපිට සල්ලි දෙන්නේ නැහැ. දේශපාලන තත්ත්වය ස්ථාවර වන්නේ නැද්ද යන්න බැලිය යුතු බව ඔවුන් කියනවා. අපි මුදල් දෙන්නේ නැහැ කියලා ඔවුන් කියන්නේ නැහැ. එහෙත් ඔවුන්ට යම් ස්ථාවර බව පැහැදිලි බවක් දැකිය යුතු යැයි කියනවා” යැයි එම නිලධාරියා කීවේය.

මහින්ද රාජපක්ෂ මහතා ඉදිරියේදී ජාත්‍යන්තර මූල්‍ය අරමුදල සමඟ කටයුතු කරනු ඇතැයි ද හිටපු අග්‍රාමාත්‍ය රනිල් වික්‍රමසිංහ මහතා ක්‍රියාත්මක කරන ලද අයවැය ඒකග්‍රතා ක්‍රියාවලිය ඉදිරියටත් ක්‍රියාත්මක කරනු ඇතැයි ද මහින්ද රාජපක්ෂ මහතාට සමීප ආරංචි මාර්ග සඳහන් කරයි.

“ඔවුන්ට එය කරන්න ඕනේ නම්, ඔවුන් බදු වැඩි කළ යුතුයි. එසේ නැතිනම් වියදම් කපාහරින්න ඕනේ. එහෙමත් නැතිනම් ඒ දෙකම එකට කරන්න ඕනේ. එහෙම වුණොත් ණය අවශ්‍යතාව කළමනාකරණය කරගන්න පුළුවන්” යැයි ද ඉහත කී නිලධාරීයා කීවේය.

ජාත්‍යන්තර මූල්‍ය අරමුදල ද ශ්‍රී ලංකාවට ලබාදීමට නියමිත මීළඟ ණය වාරිකය ලබාදීම පිළිබඳ සාකච්ඡා කල්දැමීය. ජාත්‍යන්තර මූල්‍ය අරමුදල 2016 වසරේදී ශ්‍රී ලංකාවට එක්සත් ජනපද ඩොලර් බිලියන 1.5ක ණය මුදලක් ලබාදීමට එකඟතාව පළ කළේය. ඒ අනුව තුන් අවුරුදු වාරික සැලැස්මක් යටතේ ශ්‍රී ලංකාවට ණය ලැබුණු අතර මේ වනවිට එයින් ඩොලර් බිලියනයකට වැඩි මුදලක් ශ්‍රී ලංකාවට ලැබී ඇත.

“පැහැදිලි ආණ්ඩුවක් පත්වන තුරු ජාත්‍යන්තර මූල්‍ය අරමුදල බලා සිටිනවා” යැයි එම ද නිලධාරියා කීය.

මේ අතර රුපියල ස්ථාවර කිරීම සඳහා ශ්‍රී ලංකා මහ බැංකුව මැදිහත් වී සිටී. ශ්‍රී ලංකා මහ බැංකුව රුපියල් ස්ථාවර කිරීමට මැදිහත් වී ඇති බවත් පසුගිය දින කිහිපයේදී බැංකුව විදේශ විනිමය වෙළෙඳපොළට එක්සත් ජනපද ඩොලර් මිලියන 3ත් 5ත් අතර මුදලක් යොදවා ඇති බවත් රජයේ ආරංචි මාර්ග තවදුරටත් සඳහන් කළේය.

Comments