ජනපති ගලගොඩ අත්තේ හිමියන් හමුවෙයි

18

වෙසක් පොහෝ දිනයට සමගාමීව සිරකරුවන් 762දෙනෙකු ජනාධිපති පොදු සමාව යටතේ නිදහස් කිරීම සඳහා වැලිකඩ බන්ධනාගාරයට ඊයේ (18) ගිය ජනාධිපති මෛත්‍රීපාල සිරිසේන මහතා ඉන් අනතුරුව, වැලිකඩ බන්ධනාගාර රෝහල වෙත ගොස් සිර දඬුවම් විඳින ගලගොඩඅත්තේ ඥාණසාර හිමියන් හමුවී සාකච්ඡා කර ඇතැයි එම රෝහල් ආරංචි මාර්ග අනාවරණය කරයි.

සිරකරුවන් නිදහස් කිරීමේ උත්සවය නිමවත්ම බන්ධනාගාර රෝහල වෙත ගොස් ඇති ජනාධිපතිවරයා එහිදී අංක 3 වාට්ටුවේ උපස්ථායක රාජකාරියේ යොදවා සිටින ඥාණසාර හිමියන් හමුවී විනාඩි 15ක් පමණ සුවදුක් විචාරා ඇතැයිද එහිදී මුස්ලිම් අන්තවාදීන්ගේ සුළමුළ හා වත්මන් තත්ත්වය පිළිබඳව උන්වහන්සේ ජනාධිපතිවරයාට පැහැදිලි කර ඇතැයිද වාර්තා වේ.

මෙහිදී ජනාධිපතිවරයා මරණ දඬුවම් ලබා සිටින හිටපු පාර්ලිමේන්තු මන්ත්‍රී දුමින්ද සිල්වා මහතා සහ මරණ දඬුවම් ලබා සිටින අඟුලාන පොලිසියේ හිටපු ස්ථානාධිපති නිව්ටන් යන අයද මුණගැසී ඇතැයි දැනගන්නට තිබේ. 

මේ පිළිබඳව බොදුබල සේනාවේ ජාතික සංවිධායක විතාරන්දෙණියේ නන්ද හිමියන්ගෙන් කළ විමසීමේදී උන්වහන්සේ පැවසුවේ ගලගොඩඅත්තේ හිමියන් නිදහස් කරගැනීම සම්බන්ධයෙන් රටපුරා ගෙන යන වැඩපිළිවෙළෙහි සාධනීය ප්‍රතිඵලයක් ලෙස ජනාධිපතිවරයා උන්වහන්සේ හමුවීම ගැන දකින බවය. උන්වහන්සේ නිදහස් කිරීමක් ගැන මේ අවස්ථාවේදී වචනයක් හෝ කතා කර නැතත්, මෙම 25 වැනිදායින් පසු ඒ පිළිබඳව රටපුරා උද්ඝෝෂණ, විරෝධතා සංවිධානය කර ඇති බවද උන්වහන්සේ පැවසූහ.

Comments